فوٹو: فائل

انسٹا گرام میں صارفین کے لیے ایک ایسا فیچر متعارف کرایا گیا ہے جس کا مطالبہ صارفین کی جانب سے کافی عرصے سے کیا جا رہا تھا۔

انسٹا گرام کے سربراہ ایڈم موسیری نے اس فیچر کا اعلان لگ بھگ ایک سال قبل کیا تھا اور اب جاکر اسے متعارف کرایا گیا ہے۔

اس فیچر سے صارفین اپنی پروفائل کو اپنی مرضی کے مطابق ارینج کرسکیں گے۔

یہ فیچر دنیا بھر میں صارفین کو دستیاب ہے اور اس سے انہیں اپنی پروفائل پر زیادہ کنٹرول مل سکے گا۔

صارفین اب پروفائل سیٹنگز میں ایک نئے ری آرڈر آپشن کو دیکھ سکیں گے۔

اس آپشن سے آپ اپنی پوسٹس کو کسی بھی جگہ منتقل کرسکیں گے، چاہے انہیں برسوں قبل ہی پوسٹ کیوں نہ کیا گیا ہو، جس سے پروفائل گرڈ میں آپ اوپر ایسی تصاویر رکھ سکیں گے جو کافی نیچے چلی جاتی ہیں۔

ابھی انسٹا گرام پروفائلز میں تصاویر یا پوسٹس ترتیب کے مطابق نظر آتی ہیں یعنی سب سے اوپر تازہ ترین پوسٹ ہوتی ہے۔

مگر اس نئے فیچر سے آپ پرانی پوسٹس کو کسی بھی جگہ منتقل کرسکیں گے اور اہم مواد کو ہائی لائٹ کرنا آسان ہو جائے گا۔

کمپنی کے مطابق اس فیچر کا مطالبہ بہت زیادہ کیا جا رہا تھا اور اسے ڈیزائن کرنے کا مقصد صارفین کو پروفائلز اپنی مرضی کے مطابق سجانے میں مدد فراہم کرنا ہے۔