سرپرستِ اعلیٰ ادارہ تعلیماتِ اسلامیہ پاکستان علامہ سید ریاض حسین شاہ نے کہا  کہ حضرت علیؑ کی حیاتِ مبارکہ اور شہادت پوری انسانیت کے لیے حق و صداقت، عدل و انصاف اور صبر و استقامت کی روشن مثال ہے۔ 

وہ درسِ قرآن کی ایک محفل سے خطاب کر رہے تھے جس کی میزبانی شیخ محمد قاسم ڈپٹی ڈائریکٹر نے کی، جبکہ اس موقع پر علماء و مشائخ کی بڑی تعداد بھی موجود تھی۔علامہ سید ریاض حسین شاہ نے کہا کہ حضرت علیؑ کی زندگی اسلام کی حقیقی روح، عدل و انصاف اور مظلوموں کی حمایت کا عملی نمونہ تھی اور انہوں نے اپنی پوری زندگی دینِ اسلام کی سربلندی اور حق کے پرچم کو بلند رکھنے کے لیے وقف کر دی۔ انہوں نے مزید کہا کہ ایرانی سپریم لیڈر آیت اللہ خامنہ ای نے بھی آلِ رسولؐ کے نقشِ قدم پر چلتے ہوئے حق و انصاف کے لیے جدوجہد کی اور اسی راستے میں قربانی اور شہادت حاصل کی، جو امتِ مسلمہ کے لیے حوصلے اور استقامت کی بہترین مثال ہے۔انہوں نے زور دیا کہ حضرت علیؑ علم، حکمت، شجاعت اور تقویٰ کا عظیم پیکر تھے اور ان کی تعلیمات آج بھی امتِ مسلمہ کے لیے مشعلِ راہ ہیں۔ ہمیں چاہیے کہ حضرت علیؑ اور دیگر عظیم رہنماؤں کی قربانیوں سے سبق سیکھتے ہوئے معاشرے میں عدل، محبت، اتحاد اور بھائی چارے کو فروغ دیں تاکہ ایک پرامن اور مضبوط اسلامی معاشرہ قائم کیا جا سکے۔