ژینگ یِمِنگ نے بھارت کے مکیش امبانی سے ایشیا کے دوسرے امیر ترین شخص ہونے کا ٹائٹل چھین لیا

مشہور ایپلی کیشن ٹِک ٹاک کی مالک کمپنی بائٹ ڈانس کے بانی ژینگ یِمِنگ نے بھارت کے مکیش امبانی سے ایشیا کے دوسرے امیر ترین شخص ہونے کا ٹائٹل چھین لیا۔

بلومبرگ بلینیئرز انڈیکس کی تازہ درجہ بندی کے مطابق ژینگ ییِمِنگ کی مجموعی دولت تقریباً 92.8 ارب امریکی ڈالر تک جا پہنچی ہے، جس کے بعد وہ ایشیا کے امیر ترین افراد کی فہرست میں دوسرے نمبر پر آ گئے ہیں۔ ان سے آگے صرف بھارتی ارب پتی گوتم اڈانی ہیں، جن کی دولت کا تخمینہ 97.9 ارب ڈالر لگایا گیا ہے۔

دوسری جانب مکیش امبانی تقریباً 86.9 ارب ڈالر کے ساتھ تیسرے نمبر پر چلے گئے ہیں۔

ژینگ کی دولت میں یہ غیرمعمولی اضافہ بنیادی طور پر بائٹ ڈانس کی بڑھتی ہوئی مالیت (Valuation) کا نتیجہ ہے، جسے ٹک ٹاک کی عالمی مقبولیت اور کمپنی کے مصنوعی ذہانت کے شعبے میں تیز رفتار پیش رفت نے نئی بلندیوں تک پہنچایا ہے۔ خاص طور پر بائٹ ڈانس کا اے آئی چیٹ بوٹ ڈوباؤ چین میں 30 کروڑ سے زائد ماہانہ صارفین حاصل کر چکا ہے۔

بلومبرگ کے مطابق بائٹ ڈانس کی قدر میں حالیہ اضافے (جس کی وجہ امریکا میں کمپنی کے آپریشنز سے متعلق پیش رفت اور سرمایہ کاروں کے بڑھتے ہوئے اعتماد کو قرار دیا جا رہا ہے) نے ژینگ یِمِنگ کی ذاتی دولت میں 24 ارب ڈالر سے زیادہ کا اضافہ کر دیا۔

ژینگ یِمِنگ نے 2012 میں بائٹ ڈانس کی بنیاد رکھی تھی۔ آج وہ نہ صرف چین کے امیر ترین شخص ہیں بلکہ 2019 سے (جب بلومبرگ نے ان کی دولت کا باقاعدہ ریکارڈ رکھنا شروع کیا) ان کی مجموعی دولت میں سات گنا سے بھی زیادہ اضافہ ہو چکا ہے۔