فوٹو: فائل

اسلام آباد: وفاقی وزیر صحت مصطفیٰ کمال کا کہنا ہے کہ پاکستان کا نظام صحت مزید بیمار پیدا کرتا ہے۔

جڑی بوٹیوں اور روایتی ادویات پر سیمینار سے خطاب کرتے ہوئے مصطفیٰ کمال کا کہنا تھا ہم محسوس کررہے ہیں کہ ہربل ادویات وقت کی ضرورت ہیں، لیکن ہربل سے متعلق قانون او ریگولیشن نہیں ہیں، ہم نے ہربل پر قانون سازی وزارت صحت سے وزارت قانون کو بھجوادی ہے، چند ہفتوں میں ہربل سے متعلق ڈریپ کے پاس ریگولیشنز ہوں گی۔

وفاقی وزیر صحت کا کہنا تھا یہ کانفرنس ویسٹرن میڈیسن کے خلاف نہیں، ہر شعبے کی اپنی اہمیت ہے، ویسڑن میڈیسن ایک وقت کے بعد آپ کے جسم پر اثر کرنا چھوڑ دیتی ہیں۔

مصطفیٰ کمال نے کہا کہ پاکستان میں بیمار آدمی8 دن تندرست ہونے میں لیتا ہے جبکہ دنیا میں 3 دن لگتے ہیں، ہم اسپتال بناتے ہیں، مریضوں کا انتظار نہیں کرتے، اسپتال پہلے ہی دن بھر جاتا ہے۔

وفاقی وزیر کا کہنا تھا پاکستان میں ہیلتھ کیئر سسٹم مزید بیمار پیدا کرتا ہے، بیماریاں جیسے بڑھ رہی ہیں ہرگلی میں اسپتال بنادیں پھربھی کم ہوں گے، 85 فیصد ادویات پاکستان میں بن رہی ہیں، خام مال باہرسے آرہا ہے۔